Jono : Fiofanana ho an’ireo mpanaramaso ny jono

Antananarivo, faritra Analamanga no hisitraka io fampiofanana io amin’ity adian’ny faharoa ity. 40 mianadahy izy ireo no hiofana ho Mpanaramaso ny jono na « inspecteur de pêche » ato amin’ny faritra Analamanga. Nanomboka anio ilay fiofanana, ka haharitra 7 andro. Tsy hifarana izany raha tsy ny alatsinainy 27 marsa ho avy izao. Marihina fa ho raisin’ny Sekolim-pirenenana Mpanofana Mpitsara sy Mpiraki-draharaha eto Madagasikara(ENMG) ny fanatanterahana izany ho amin’ity andiany faharoa ity.
Tanjona amin’izao fampiofanana izao tokoa ny hahafantaran’ireo mpanaramaso ny làlana mifehy ny jono. Manampy amin’ny fiadiana amin’ny fanondranana hazan-drano antsokosoko sy amin’ny fampianarana ireo mpisehatra hanaja ny taom-panjonoana izany.
Eny maro tokoa ireo trangana fanondranana tsy nahazoana alàlana tratra tato ato, sy ireo olona manjono ao anatin’ny vanim-potoana voarara. Ny faran’ny herin’andro teo izao dia trondro milanja 2 taonina izay saika aondrana ho any Mayotte no tratran’ny zandary tao Nosy Be. Ny fampiofanana tahaka izao dia tafiditra tanteraka ao anatin’izany ady amin’ny tsy fanarahan-dàlana izany sy ao anatin’ny fiarovana ny hazan-drano.