Fifandraisana ara-diplomatika : Nahazo masoivoho vaovaon'ny firenena norveziana i Madagasikara

Andriamatoa Gjermund SAETHER no masoivohon'i Norvezy vaovao eto Madagasikara. Androany maraina no nandraisan'ny filoham-pirenena Andry Rajoelina azy teny amin'ny lapam-panjakana Iavoloha.
Tsiahivina fa i Norvezy dia mpanohana mavitrika ny sehatry ny fambolena sy ny ady amin'ny tsy fanjarian-tsakafo eto Madagasikara. Tsy adino ny famatsiam-bola sy ny fandraisana anjara amin'ny endrika samihafa ny fampianarana sy ny ady amin'ny herisetra mifototra amin'ny mahalahy sy ny mahavavy. Miara-miombon'antoka amin'ny Madagasikara amin'ny famokarana angovo azo havaozina ihany koa i Norvezy. Efa maherin'ny 150 taona ny fiaraha-miasa teo amin'ny firenena roa tonta.

Mpamatsy vola mavitrika

Araka ny efa voalaza tetsy ambony, tsy azo hodian-tsy hita ireo fanampiana efa natolotr'i Norvezy ho an'i Madagasikara. Ny tena nanamarika ny fiaraha-miasa dia ny fanampiana mavitrila taorian'nt krizy Covid-19. Nanolotra vola mitentina 4,16 tapitrisa dolara mantsy ny governemanta norveziana mba anarenana ny sehatry ny fanabeazana, indrindra fa tany amin'ny faritra Anosy.
Manan-danja amin'ny firenena Malagasy ny fanamafisan'i Norvezy indray ny fiaraha-miasa sy ny fifanakalozana amin'ny firenena Malagasy.