Fanarenana ny fampianarana : Manao antso avo amin’ny mpisehatra rehetra ny Vovonana Vonjeo ny fampianarana

Hamahana olana marolafy

Fotoana lehibe entin’ireto mpisehatra ireto hikaroham-bahaolana amin’ny lafiny maro samihafa mifandraika amin’ny fampianarana sy ny fanabeazana io fotoana io. Haharitra roa andro izany ary hitovy avokoa ny firafitry ny fotoana isam-paritra. Afaka handray anjara amin’izany avokoa ny mpampianatra, mpanabe, mpampiofana, ireo mpisehatra samihafa ary ihany koa ny olom-pirenena manan-kevitra.
Hikaroham-bahaolana ao ireo zava-misy nitarainan’ireo mpisehatra tao amin’ny tranonkala novokarin’ny vovonana. Ao anatin’izany ny olana mikasika ny fandraisana ny mpampianatra ho mpiasam-panjakana ; ny olana mikasika ny fampidirana mpiasa sy ireo zo tokony sitrahin’izy ireo. Hanampy izany ny fikaroham-bahaolana hampifanarahana ny olona amin’ny toerana misy azy. Isan’ny be mpitaraina ihany koa ny mikasika ny fampiharana ny fandaharam-pianarana vaovao sy ireo maro hafa. Samy haneho vahaolana ka handrafitra izany ho azo ampiasaina izy ireo.

Hamerina ny hasin’ny fanabeazana

Tanjon’ity fikaonan-doha ity ny hamerina indray ny hasin’ny fampianarana eto Madagasikara. Ao anatin’izany dia hamiratra kokoa ny ho avin’ny zaza malagasy, na eny anivon’ny fiaraha-monina izany na eo amin’ny tontolon’ny asa na eo amin’ny fianakaviana. Fantatra mantsy fa mpisehatra rehetra amin’ny lafiny fanabeazam-pirenena, fampianarana teknika ary fampianarana ambony no handray anjara amin’ity fikaonan-doha ity. Izany rehetra izany dia natao mba tena hisian’ny fampandrosoana maharitra tokoa. « Hihemotra hatrany isika raha tsy mandray andraikitra dieny izao », hoy hatrany ny avy ao amin’ny Vovonana. Hitondra ainga vao ho an’ny fampianarana araka izany io fotoana io.