Fomba tsotra fanaovana « bavarois à la fraise »
Mofomamy matsiro sy mangatsitsiaka tena isan’ny be mpankafy ny « bavarois à la fraise ». Mbola lafo vidy tokoa izy ireny raha vidiana eny amin’ireny mpanao mofomamy lehibe ireny. Azo atao tsara ny manamboatra azy ity ao an-trano atao « goûter » na atao tsindrin-tsakafo, sady efa manomboka mafana izao ny andro.
Ireo zavatra ilaina raha hanao « bavarois à la fraise »
-Frezy 500g ;
-« Gélatine feuilles » singany 3 ;
-« Crème liquide sucrée » mangatsiaka tsara 200g ;
-Siramamy 300g ;
-Atody 3 ;
-Lafarina 200g ;
-« Levure chimique » 1/2 ny sotrokely ;
-Menaka 1/2 ny kaopy kely.
Ireo dingana amin’ny fikarakarana azy
Lomana rano ny « gélatine ».
Sasana tsara ny frezy, esorina ny tahony. Andrahoina miaraka amin’ny siramamy ny 2/3. Ny ambiny tetehana ary atokana. Rehefa masaka tsara ny frezy nandrahoina dia bataina teo ambony afo. Tsy atao ritra be loatra fa avela hisy ranony kely fotsiny. Potserina mba halemy tsara.
Arotsaka ao anatin’ny frezy ny « gélatine ». Aroharoana tsara mandrapahalevony. Avela hangatsiaka.
Kapohana amin’ny « batteuse » ny « crème liquide ». Rehefa miakatra tsara la « chantilly » dia arotsaka ao ny frezy efa mangatsiaka tsara. Aroharoana moramora mba hifangaro tsara. Io fangaro io no atao hoe « mousse de fraises ».
Alahatra anaty lasitra (moule) ny frezy voatetika (ireo tsy nandrahoina). Araraka eo amboniny ny « mousse de fraises ». Ampidirina anaty vata fampangatsiahana mandritra ny adiny 1 ora.
Etsy andaniny kapohana anaty « saladier » ny siramamy sy atody. Arotsaka ny menaka dia tohizana kapohana. Alefa ao manarak’izay ny lafarina sy ny « levure ». Afangaro tsara. Atao anaty lasitra io paty io ary andrahoina anaty lafaoro amin’ny hafanana 180°C mandritra ny 30 minitra. Rehefa masaka dia avela mangatsiaka. Raha somary matevina ilay mofomamy dia zaraina roa amin’ny hahavony, raha efa manify dia tsy mila zaraina intsony.
Ny silany iray amin’ny mofomamy ihany no ampiasaina raha nozaraina roa. Tondrahana ranon-tsiramamy (sirop) kely mba ho mandomando ary apetraka eo ambonin’ilay « mousse de fraises » tao anaty vata fampangatsiahana teo. Ampidirina anaty vata fampangatsiahana mandritra ny alina tontolo.
