Tontolo iainana : Voatazona ny sata maha faritra manan-danja ho an’ny zavamananaina ny Valanjavaboahary Nosy Hara

Ny Ankoay no anisan’ny antony lehibe

Mirefy 1 288,78 km² ny Valanjavaboary Nosy Hara. Anisan’ny antony lehibe nahafahany nitazona ny sata KBA ny fisian’ny Ankoay, na Voromahery mpanjono eto Madagasikara (Ichthyophaga vociferoides). Karazam-borona tsy fahita firy izy io ary sokajian’ny Lisitra Mena an’ny UICN ho tandindonin-doza fatratra. Manodidina ny 14 ihany ireo Ankoay lehibe voarakitra ao amin’ny faritry ny Nosy Hara, amin’izao fotoana izao.
Manana anjara toerana lehibe amin’ny fiarovana ny toeram-ponenan’ity karazam-borona ity, araka izany, ny valan-javaboary. Ny fisiany ao an-toerana dia manamafy ihany koa ny maha-zava-dehibe an’i Nosy Hara ho an’ny fiarovana ny zavamananaina.
Tsy ny Ankoay ihany anefa no maha-zava-dehibe ity faritra ity. Manana lanja ara-tontolo iainana, ara-toekarena ary ara-tsosialy ihany koa i Nosy Hara. Zava-dehibe amin’ny rohivoary an-dranomasina sy amorontsiraka izany faritra izany, ka mitaky ezaka mitohy ny fiarovana azy.

Mihoatra ny tanjona napetraky ny GEF6-AMP

Nankatoavin’ny Sekretarian’ny KBA ny fanamafisana ny satan’i Nosy Hara, ka manome lanja ireo ezaka fiarovana ataon’ireo mpiara-miombon’antoka. Anisan’izany ny Minisiteran’ny Tontolo iainana sy ny Fandrosoana Lovainjafy (MEDD), ny Madagascar National Parks (MNP), ny tetikasa GEF6-AMP ary ny WWF.
Mihamitombo ihany koa ny velaran’ireo KBA an-dranomasina sy amorontsiraka voamarina eto Madagasikara. Mahatratra 3 540 957 hektara izany amin’izao fotoana izao, raha 2 500 000 hektara kosa ny tanjona napetraky ny GEF6-AMP. Nihoatra izany tanjona izany noho izany ny vokatra azo hatreto.
Ny fanamafisana ny satan’i Nosy Hara dia manasongadina ny lanjan’ireo faritra arovana amin’ny fiarovana ireo karazam-biby sy ny toeram-ponenany. Izy io koa dia manamafy ny ezaka ataon’i Madagasikara amin’ny fiarovana ny zavamananaina an-dranomasina sy amorontsiraka.