Ireo anton-javatra tsy mampahita tory na maharatsy torimaso

Ireo olana ara-tsaina

Araka ny vokam-pikarohana nataon’ireo manam-pahaizana tany ivelany dia voalaza fa ny 50% ny tsy fahitan-tory sy ny fikorontanan’ny torimaso dia avy amin’ny antony ara-tsaina. Santionany amin’ireto farany ny rarintsaina, ny « burn-out », ny fahaketrahana, ny fitaintainana, ny adin-tsaina… Rehefa mivesatra be loatra ao an-tsaina ireo anton-javatra ireo dia manjary lasa manakorontana ny torimaso. Izany hoe, lasa sarotra vao mahita tory na tapa-tory lava hany ka lasa tsy ampy torimaso.

Ny tsy fahafehezana ny fihetseham-po

Mifanakaiky amin’ireo antony ara-tsaina ihany ireo antony ara-pihetseham-po tsy mampahita tory na maharatsy torimaso. Avy amin’ireo tranga isan-karazany miseho eo amin’ny fiainana moa no mahatonga ireo antony ara-pihetseham-po. Mety tsy mampahita tory na maha tapa-tory avokoa na ireo tranga mahafaly na ireo sedra mampalahelo. Mahazana moa dia mandalo ihany ny fikorontanan’ny torimaso vokatry ny fihetseham-po. Isan’ireo mety mahatonga izany ohatra ny alahelo na ny hatezerana vokatry ny fisarahana amin’ny olon-tiana, fahaverezana asa… Etsy andaniny, misy ihany koa ny hafaliana lehibe ateraky ny fahazoana asa vaovao, fanambadiana…

Ireo fahazaran-dratsy eo amin’ny fomba fiainana sy ara-tsakafo

Isan’ireo anton-javatra lehibe tsy mampahita-tory sy maha ratsy torimaso ny fahazaran-dratsy eo amin’ny fomba fiainana sy ara-tsakafo. Raha eo amin’ny fomba fiainana manokana dia maro ireo fahazaran-dratsy mila ialana, toy ny tsy fanaovana fanatanjahantena, ny fijerena « écrans » be loatra rehefa alohan’ny hatory, ny fiaretan-tory matetika loatra… Eo amin’ny lafiny ara-tsakafo kosa dia mila ajanona ny fihinana sakafo mavesatra, matavy ary saro-devonina rehefa hariva. Ny fisotroana toaka be loatra ihany koa dia manakorontana ny torimaso.

Ireo olana ara-batana sy ara-pahasalamana

Mety mahatonga tsy fahitan-tory na maha ratsy torimaso ihany koa ny olana ara-batana sy ny olana ara-pahasalamana. Ny tsy fahitan-tory tokoa mantsy matetika dia tafiditra anatin’ny soritr’aretina mahakasika karazana aretina maro. Anisan’ireo aretina mahatonga izany ohatra ny sohika, ny « hyperthyroïdie », ny aretin’ny aty, ny homamiadana, ny aretina mahavoa ny atidoha… Mazava ho azy fa misy soritr’aretina maro hafa miaraka amin’izany tsy fahitan-tory izany. Ny fizahana ataon’ny mpitsabo irery ihany kosa nefa no afaka manamarina ny aretina mety fonosin’ity farany.