Taom-pianarana vaovao : torohevitra hanatsarana ny fitadidian’ny ankizy

Fanatsarana ny fitadidian’ny ankizy : mila fomba fiaina ara-pahasalamana

Isan’ireo torohevitra voalohany hanatsarana ny fitadidian’ny ankizy ny fametrahana fomba fiaina ara-pahasalamana. Anisan’ny tokony atao amin’izany ny :
-Fahampiana torimaso. Zava-dehibe amin’ny fanamafisana ny fitadidiana ny torimaso. Mandritra ny alina ny atidoha no mifantina sy mitahiry ireo zavatra nianarana nandritra ny tontolo andro ;
-Fihinanana sakafo voalanjalanja. Misy ireo karazana sakafo manankarena « oméga-3 », vitamina B sy « antioxydants » no tsara ho an’ny atidoha sy ny fitadidiana. Anisan’izy ireny ny trondro matavy, ny voankazo sy legioma, ny « noix »… ;
-Fanaovana fanazaran-tena. Ny fanazaran-tena sy ny fanatanjahantena dia mandrisika ny fikorian’ny rà, toy ny rà mankany amin’ny atidoha. Izany dia manatsara ny « fonctions cognitives », ka anisan’izany ny fitadidiana, ny fifantohana…

Mampihatra paikady fianarana « actives »

Rehefa mampianatra ny ankizy ao an-trano, toy ny rehefa mamerin-desona, dia tsy asaina manao tsianjery be fahatany fotsiny izy fa mila amporisihana mba hahazo tsara ireo lesona hianarany. Anisan’ireo fomba manampy amin’izany ny :
-Fampifandraisana ny « informations » vaovao amin’ny zavatra efa hainy. Izany dia mba hahamora ny fitadidiana izany ;
-Fampiasana ny « aides visuelles », toy ny sary sy ny « fiches » maro loko dia mety manampy betsaka hanatsarana ny fitadidiana ny zavatra hianarana ;
-Fanazavana ilay lesona hianarana amin’ny olona hafa. Izany hoe rehefa avy mianatra lesona ny ankizy dia asaina averina hazavainy izany mba hahafana mitadidy tsara azy ;
-Fampiasana lalao sy « activités » mahafinaritra. Tsy voatery raisina ho asa be ny fianarana. Fomba iray manampy ny ankizy hampikotrana sy hanatsara ny fitadidiana ny laolao sy ny fanaovana « activités » mahafinaritra, toy ny « puzzle », « jeux de mots »…