Aretina « Parkinson » eo amin’ny ankizy : ‘ndeha ho resahana

Inona no atao hoe aretina « Parkinson » eo amin’ny ankizy ?

Zava-dehibe ny fanavahana ny aretina « Parkinson » fahita eo amin’ny olon-dehibe sy ny « Parkinson » mahazo ny ankizy sy ny tanora. Matetika ity farany dia avy amin’ny fototarazo sy vokatry ny « mutations » manokana izay mitarika tsy fahatomombanana eo amin’ny famokarana na fitondrana ny « dopamine » ao amin’ny atidoha.

Ahoana ny fomba fisehon’ny aretina ?

Tsy mitovy amin’ny fisehon’ny « Parkinson » mahavoa ny olon-dehibe ny soritr’aretin’ny « Parkinson » eo amin’ny ankizy. Anisan’ireo fisehon’ity farany ny :
-« Bradykinésie/Akinésie ». Izany hoe ela sy mihena ny fihetsika (manana fahasarotana manatanteraka « mouvement »). Izy io moa no isan’ny fambara lehibe indrindra ;
-Fahatsapana mienjana na miziriziry ny hozatra ;
-Fangovitana rehefa tsy manao zavatra ;
-« Dystonie ». Soritr’aretina manokana izay matetika miseho dieny am-boalohan’ny aretina izy ity. Miseho amin’ny fomba fijoro (posture) tsy ara-dalàna na « crampes » manaintaina izy io, indrindra eo anivon’ny tongotra sy ny ranjo ;
-Tsy fahatomombanana eo amin’ny famindra. Mety hoe mandeha miadana kely, fohy ny famindra…
-Fambara hafa mahalana, toy ny fahaketrahana sy tebiteby, ratsy torimaso, fanaintainana vokatry ny fihenjanan’ny hozatra na avy amin’ny « dystonie ».

Fitsaboana

Mbola tsy misy ny fitsaboana hahafahana manasitrana ny « Parkinson » eo amin’ny ankizy. Mifantoka amin’ny fampitoniana ireo soritr’aretina sy amin’ny fanatsarana ny fomba fiaina ny fandraisana an-tanana ity aretina ity. Ho fanampin’ny fitsaboana ara-panafody dia misy ihany koa ireo « approche multidisciplinaire » atao, toy ny « kinésithérapie », « orthophonie », « Ergothérapie »…