Fananahana : ny tsara fantatra mikasika ny « contraception d’urgence »

Inona no atao hoe « contraception d’urgence » ?

Araka ny voalaza teo ambony dia vahaolana « vonjy taitra » ho an’ny vehivavy natao hisorohana ny vohoka tsy niriana aorian’ny firaisana ara-nofo tsy voaaro ny « contraception d’urgence ». Izany hoe tsy azo ampiasaina atao fanabeazana aizana maharitra izy io. Misy karazany roa lehibe ny « contraception d'urgence » :
-Ny Pilina (Pilule du lendemain). Izy ity no be mpampiasa indrindra. Misy karazany roa izy io arakaraka ny heriny. Ny voalohany dia ilay azo hoanina anatin’ny 3 andro (72 ora) aorian’ny firaisana. Ny faharoa kosa dia azo hoanina hatramin’ny 5 andro (120 ora) aroian’ny firaisana.
-Ny « Stérilet » (DIU au cuivre). Izy ity indray dia fitaovana kely apetraky ny mpitsabo any anaty tranon-jaza. Izy io no fomba fisorohana ny vohoka tsy niriana mahomby indrindra raha atao ao anatin'ny 5 andro aorian'ny firaisana.

Rahoviana no mampiasa « contraception d’urgence » ?

Ampiasaina ny « contraception d’urgence » raha toa ka :
-Nanao firaisana ara-nofo anatin’ny fotoana mahalonaka (ovulation) nefa tsy nampiasa fiarovana toy ny kapaoty… ;
-Rovitra na triatra ny kapaoty ;
-Nanadino nihinana pilina fanabeazana aizana ;
-Nisy fanolanana na herisetra ara-nofo.

Ireo fanamarihana mikasika ny « contraception d’urgence »

Misy ireo fanamarihana tsara fantatra mialohan’ny hampiasana ny « contraception d’urgence » :
-Arakaraky ny hanatanterahana malaky ny « contraception d’urgence », izany hoe ny fihinanana ny « pilule du lendemain » na ny fametahana ny « DIU au cuivre » no mampandaitra azy. Tsy tokony hiandry ela aorian’ny firaisana tsy voaaro.
-Tsy fanalana zaza izy io. Ny « contraception d’urgence » dia manakana ny « ovulation » (pilina) na koa manakana ny « fécondation » (DIU). Raha efa bevohoka vao mampiasa azy ireny dia tsy mandaitra intsony izy io satria tsy manala zaza.
-Tsy miaro amin’ny aretina azo avy amin’ny firaisana ara-nofo izy io. Ny kapaoty ihany no miaro amin'izany.
Ireo mety ho vokatry ny fanafody « contraception d’urgence » : mety ho fanina kely, maloiloy, misy fikorontanana ny fadimbolana aorian’ny nampiasana azy. Averina hatrany fa tsy fanabeazana aizana fanao isan’andro ny « pilule du lendemain ». Tsy tokony hoanina mihoatra ny indroa ao anatin’ny taona izy io.