Ny aretina isany fahita indrindra eto Madagasikara sy ny fisorohana izany

Aretina fahita eto Madagasikara : Tazomoka na « paludisme »

Ny tazomoka dia isan’ny aretina be mpahazo indrindra eto Madagasikara. Mifindra amin’ny alalan’ny kaikitry ny moka mitondra otrikaretina izy, indrindra any amin’ny faritra mafana sy amorontsiraka.
Fomba hisorohana azy :
-Matory ao anaty lay aro moka misy fanafody,
-Mampiasa fanafody manohitra moka,
-Mitafy akanjo mandrakotra tsara rehefa hariva,
-Manafoana ny rano miandrona sy lobolobo manodidina ny trano.

Aretina amin’ny taovam-pisefoana na « infections respiratoires aiguës »

Ny aretina amin’ny taovam-pisefoana toy ny « bronchite » na « pneumonia » dia isan’ireo fahita indrindra eto Madagasikara ka ny ankizy sy ny zokiolona matetika no tena tratran’izany.
Fomba hisorohana azy :
-Manasa tanana matetika,
-Miala amin’ny setroka be (arina, kitay),
-Manokatra varavarankely mba hidiran’ny rivotra madio,
-Manao vaksiny raha azo atao.

Aretina miteraka fivalanana na « maladies diarrhéiques »

Matetika dia avy amin’ny rano tsy madio na sakafo tsy voakarakara tsara ny aretina miteraka fivalanana. Izy ireo dia tafiditra ho isan’ireo antony lehibe mahatonga fahafatesan’ny zaza.
Fomba hisorohana azy :
-Misotro rano madio (nampangotrahina na voatsabo),
-Manasa tanana alohan’ny hisakafo,
-Andrahoina ho masaka tsara ny sakafo, indrindra ny hena,
-Miala amin’ny sakafo tsy ara-pahasalamana, na tsy azo antoka ny fahadiovany, eny an-dalambe.

Raboka na « tuberculose »

Ny raboka dia aretina mifindra amin’ny rivotra ary mahazo indrindra ny havokavoka. Mbola maro ireo tranga miseho eto amintsika izay mitarika fahasarotana ara-pahasalamana lalina raha tsy mahazo fitsaboana ara-dalàna ny marary.
Fomba hisorohana azy :
-Manao fitiliana raha misy kohaka maharitra,
-Manaraka tsara ny fitsaboana omena,
-Miala amin’ny toerana tery sy tsy misy rivotra.