Nosy Lonjo Antsiranana : Vakoka iraisam-pirenena, vato masina ary manan-tantara
Ao afovoan’ny ranomasina miloko manga madio, mivelatra ao anatin’ny iray amin’ireo helodrano lehibe indrindra ao Antsiranana no mijoro sy miseho ny endriky ny Nosy Lonjo. Tsy vato miseho avy ao anaty ranomasina fotsiny izy io, fa mariky ny maha-izy azy ho an’ny mponina ao Antsiranana, ary ivon’ny hasin’ny kolontsaina sy ny natiora ao avaratr’i Madagasikara.
Vakoka voajanahary tsy manam-paharoa
Nosy Lonjo, fantatra ihany koa amin’ny anarana hoe “Pain de sucre”, dia vatolampy miendrika andry mipoitra avy ao anaty ranomasina. Mirefy 122 metatra ny haavony, ary 4,5 hektara kosa ny velarany ka hita mazava tsara avy eny an-tampon-tanànan’Antsiranana. Ny hatsaran-tarehiny sy ny toe-tany nipoirany avy amin’ny fipoahan’ny volkano taloha no mahatonga azy ho tafiditra ao anatin’ireo zavatra voajanahary tsy manam-paharoa, mitovitovy amin’ireo toerana malaza eran-tany maromaro. Raha tsiahivina dia efa ny taona 2018 ny UNESCO no nanaiky ny maha-vakoka iraisam-pirenena ity toerana iray ity. Mahasarika ny maso sy mahavariana tokoa izy. Iza moa no tonga eto Antsiranana, no tsy maka sary eo amin’izany « Pain de sucre » ?
Vohitra manan-kasina
Ho an’ny mponina ao an-toerana, tsy vato tsotra ny Nosy Lonjo. Toerana feno mistery sy hasina izy, ary misy angano maro mihitsy mitantara ny niandohany. Voalaza fa toerana nisy fombafomba nentim-paharazana fahiny izy, ary heverina ho misy mbola miaro sy miahy mandrakariva ireo fanahy ao. Mbola maro ireo mponina any an-toerana no manao « joro » sy « hasina » ; na hoe mangata-pitahiana eny an-toerana. Noho izany, ny fidirana mivantana sy ny fitsidihana ny tampony dia voafetra, mba hanajàna ny finoana sy ny kolontsain’ny mponina. Io fifangaroan’ny voajanahary sy ny ara-panahy io no manandratra ny lanjan’i Nosy Lonjo eo amin’ny tantara sy ny kolontsaina Malagasy.
Fisarihana mpizahatany
Nosy Lonjo ankehitriny dia iray amin’ireo toerana hisarihana mpizahatany ao avaratra ao. Mpizahatany maro no mankafy maka sary azy, avy eny amin’ny toerana ambony, na mitsidika amin’ny sambo sy mankafy ny fitsirihana ny rano manodidina azy. Ny lokon’ny rano madio mangarahara sy ny haran-dranomasina manodidina azy dia manintona ireo mpilomano sy mpizaha tany. Na izany aza, mbola voatazona ny sakana amin’ny fitsidihana mivantana, mba hiarovana ny hasiny sy ny tontolo iainany.
Mila fiarovana sy andraikitra iombonana
Na eo aza ny lazany sy ny hakantony, tsy afa-miala amin’ny tsindry samihafa ihany koa i Nosy Lonjo. Ao anatin’izany ny fiovaovan’ny toetr’andro, fihanaky ny fizahantany tsy voafehy, ary ny loza mitatao amin’ny ranomasina. Noho izany, ilaina ny fiaraha-mientan’ny rehetra, avy amin’ny fiarahamonina eo an-toerana, ny tompon’andraikitra ary ny fikambanana mpiaro tontolo iainana, amin’ny fandraisana andraikitra. Ny fitazonana ny fahadiovan’ny rano sy ny fanajana ny fomban-drazana dia singa fototra amin’ny fiarovana azy.
Nosy Lonjo dia tsy hoe vato saro-takarina eny an-dranomasina fotsiny ka mahafinaritra ny maso fa sady tandindon’ny hasin’ny natiora sy ny kolontsaina. Manambatra ny tantara sy ny lova ara-panahy izy. Raha tsy harovana sy hotandrovana, dia ho very am-pitombenana io vakoka tsy manam-paharoa io. Fa raha karakaraina, dia hitohy ho mariky ny voninahitr’i Diego Suarez sy ho reharehan’ny Malagasy iray manontolo i Nosy Lonjo.
