Fahasalamana : ireo vokatsoa azo avy amin’ny « thym »

Vokatsoa azo avy amin’ny « thym » : manampy amin’ny fikoloana ny taovam-pisefoana

Isan’ireo akora natoraly efa fampiasan’ireo razambe amin’ny fikolokoloana ny fahasalaman’ny taovam-pisefoana ny « thym ». Anisan’ireo vokatsoa azo avy aminy ny :
-Fiadiana amin’ireo bakteria sy viriosy mahatonga ireo « infections ORL ». Mitahiry « thymol » sy « carvacrol » amin’ny tahany ambony tokoa mantsy ny « thym ». Ireo singa ireo no miasa amin’ny fiadiana amin’ireo otrikaretina ;
-Fampitoniana ny kohoka sy ny gripa. Manana fiasa « expectorant » sy « antitussif » ny « thym ». Rehefa ampiasaina atao « sirop » izy io dia manampy amin’ny fanesorana ireo tsentsina ao amin’ny taovam-pisefoana, mampitony ny kohoka ary manamora ny fivoahan’ny rehoka ;
-Fampitoniana ny tenda. Manampy amin’ny fampitoniana ny areti-tenda sy ny « angines » ihany koa ny « thym ».

Mampitony ireo « inflammations » eo amin’ny hoditra ny « thym »

Azo ampiasaina amin’ny fitsaboana ny ratra sy aretin-koditra tsy sarotra ihany koa ny « thym » noho izy manana fiasa « antiseptiques ». Ankoatra izay dia manana fiasa « antifongique » ihany koa izy io, izany hoe mampijanona ny fihombon’ny « champignons ». Manampy betsaka amin’ny fampitoniana ny fanaintainana sy ny fivontosana eo amin’ny hoditra ihany koa izy io noho izy manana fiasa « anti-inflammatoires ». Tsotra ny fampiasana azy. Avela hilona anaty rano mangotra mandritra 10 minitra ny « thym » 5g. Io vokatra io no petapetahana amin’ny alalan’ny « compresses » eo amin’ilay faritry ny hoditra tsaboina.

Fanamarihana

Marihana fa tsy mahasolo ny fitsaboana amin’ny fanafody ny fampiasana ny « thym ». Izany mila manantona mpitsabo hatrany rehefa marary fa tsy miantehitra amin’ny fampiasana azy io. Natao manampy fotsiny ihany izy io fa tsy hitsabo tanteraka.