Mahatsiaro mafana kokoa noho ny mahazatra rehefa bevohoka : Inona no antony ?
Maro ny vehivavy mahatsiaro mafana kokoa noho ny mahazatra mandritra ny fitondrana vohoka, na dia tsy mafana aza ny toerana misy azy. Mety hahatsapa mafana be tampoka, na tsemboka be kokoa, na mahatsiaro mafana foana. Amin’ny ankapobeny dia vokatry ny fiovana voajanahary mitranga ao amin’ny vatana mandritra ny fitondrana vohoka izany. Araho eto ny santionany amin’ireo fiovana mety mahatonga izany.
Manana anjara lehibe ny hormonina
Manomboka ny herinandro voalohany amin’ny fitondrana vohoka dia makatra be ny tahan’ny hormonina, indrindra ny « œstrogène » sy ny « progestérone ». Ireo fiovana ireo dia mety hisy fiantraikany amin’ny fomba fandrindran’ny atidoha ny hafanan’ny vatana.
Ny « progestérone » moa dia mety hampiakatra kely ny hafanan’ny vatana. Noho izany dia mety hahatsapa hafanana kokoa noho ny mahazatra ny vehivavy sasany, indrindra mandritra ny telo volana voalohan’ny vohoka.
Mety hiteraka fahatsapana hafanana tampoka ihany koa ny fiovan’ny hormonina. Mitovitovy amin’ny fahatsapana mety hitranga amin’ny vehivavy mandritra ny vanim-potoana hafa mampikorontana ny hormonina moa izany.
Miasa bebe kokoa ny vatana
Mandritra ny fitondrana vohoka dia tsy maintsy mamaly ny filàn’ny reny sy ny zaza ao an-kibo ny vatana. Mitombo tsikelikely ny habetsahan’ny rà mba hahafahana mamatsy tsara ny ahitra sy ny zaza. Noho izany dia miasa bebe kokoa ny fo ary mihamalaky ihany koa ny metabolisma.
Miteraka hafanana bebe kokoa ao amin’ny vatana izany asa fanampiny izany. Izany no anisan’ny mahatonga ny vehivavy bevohoka mora hahatsapa mafana kokoa rehefa mandeha, miakatra tohatra, na manao asa tsotra andavanandro.
Ny fiovan’ny vatana
Rehefa mandroso ny fitondrana vohoka dia miova tsikelikely ny vatana: mitombo ny kibo, miakatra ny lanjan’ny vatana ary mety mitaky ezaka bebe kokoa ny fivezivezena. Ireo fiovana ireo dia mety hampitombo ny fahatsapana hafanana eo amin’ny bevohoka. Mety ho tsapa kokoa moa izany fiovan’ny vatana izany amin’ny telo volana farany.
Mety ho sarotra ihany koa ny miaritra hafanana amin’ny alina. Ny efitra mafana loatra, ny akanjo matevina na ny lamba firakotra tsy mampita rivotra tsara dia mety hampitombo ny hatsembohana amin’ny alina ary hanelingelina ny torimaso.
Ara-dalàna foana ve izany?
Amin’ny ankapobeny dia tsy mampidi-doza ny fahatsapana hafanana mandritra ny fitondrana vohoka raha toa ka fahatsapana hafanana fotsiny na tselatra hafanana miseho vetivety ihany. Na izany aza anefa dia tsy tokony hoheverina ho vokatry ny fitondrana vohoka avokoa ny soritr’aretina rehetra.
Raha tena miakatra ny hafanan’ny vatana, na miaraka amin’ny mangovitra, fahalemena na fanina mafy, fahasarotana amin’ny fifohana rivotra, fitempon’ny fo tsy mahazatra, na soritr’aretina mampanahy hafa, dia tokony manatona mpitsabo. Ny tazo, ohatra, dia mety ho famantarana aretina ka mila fanombanana ara-pahasalamana mandritra ny fitondrana vohoka.
Ahoana ny atao hampihenana ny fahatsapana mafana be rehefa bevohoka ?
Ireto misy torohevitra tsotra afaka manampy:
-Misotro rano matetika;
-Manao akanjo malalaka sy maivana;
-Misafidy lamba mora mampita rivotra;
-Avela hisy rivotra miditra sy mifamezivezy ao an-trano ;
-Tsy manao ezaka ara-batana mafy rehefa tena mafana ny andro;
-Mandro amin’ny rano matimaty na somary mangatsiatsiaka mba hampangatsiaka ny vatana;
-Miala sasatra rehefa miaraka amin’ny havizanana ny fahatsapana hafanana.
