Antananarivo : Mampitaraina ny mponina ny lavapiringa tsy madio sy ny fivarotana hanimasaka tsy manaraka ny fepetra ara-pahasalamana
Roa volana taorian’ny nampiharana ny Fehezan-dalàna fikoloam-pahasalamana (Code municipal d’hygiène – CMH), dia efa nahatratra 122 ny isan’ny ny sazy ara-bola nampiharin’ny Kaominina Antananarivo Renivohitra. Anisan’ny fandikan-dalàna, taterin’ny mponina matetika ny fampiasana lavapiringa tsy madio, ny fanariana rano maloto tsy ara-dalàna ary ny fivarotana sakafo masaka tsy manaraka ny fenitra momba ny fahadiovana.
Ifantohan’ny fanaraha-maso ireo lavapiringa tsy madio
Araka ny nambaran’ny tompon’andraikitra eo anivon’ny kaominina, dia nitombo 40 % tato anatin’ny volana vitsivitsy ny fitarainana momba ny fahalotoana eto Antananarivo. Anisan’ireo faritra ahitana fitarainana betsaka indrindra ny Boriborintany voalohany sy fahefatra. Manoloana izany toe-draharaha izany dia nohamafisin’ny sampan-draharahan’ny kaominina ny fanaraha-maso eny anivon’ny fokontany. Ny sokajy fandikan-dalàna tena ahitana sazy matetika dia ny fampandoavana lamandy 50 000 ariary. Tafiditra ao anatin’izany, indrindra, ny fampiasana lavapiringa heverina fa tsy madio sy ny fanariana rano maloto amin’ny toerana tsy nahazoana alalana.
Ho an’ny tompon’andraikitra, mety hiteraka loza ara-pahasalamana lehibe ireo fomba fanao ireo, indrindra any amin’ny faritra be mponina, satria mety hanamora ny fiparitahan’ny aretina vokatry ny tsy fahampian’ny fahadiovana sy ny fidiovana.
Arahi-maso akaiky ihany koa ny fivarotana sakafo
Tafiditra ao anatin’ny naharaisana fitarainana maro ihany koa ny fivarotana sakafo masaka tsy manaraka ny fenitry ny fahadiovana. Araka izany dia hamarinin’ireo mpanara-maso ny fahadiovana, ohatra, ny fomba fanomanana, fitehirizana ary fivarotana ireo sakafo atolotra ny mpanjifa. Mampahatsiahy ny kaominina fa tena ilaina ny fanajana ny fitsipika momba ny fahadiovan’ny sakafo mba hisorohana ny fanapoizinana ara-tsakafo sy ny loza mety hitranga amin’ny fahasalamam-bahoaka. Ireo izay mandika izany dia mety hiharan’ny sazy voalazan’ny Fehezan-dalàna mifehy ny fahadiovana eo anivon’ny kaominina, ka miankina amin’ny hamafin’ny fandikan-dalàna ny sandan’ny lamandy. Manomboka amin’ny 5 000ariary, 50 000ariary, 300 000 ariary, 1 tapitrisa ariary ary 3 tapitrisa ariary izany sazy izany.
Mba hanatsarana ny fahombiazan’ny fanaraha-maso dia nohavaozin’ny kaominina ny fandaminana ny asan’ireo mpanara-maso ny fahadiovana miisa 54, izay miandraikitra ireo fokontany 192 eto an-drenivohitra. Hisy mpiasa hotendrena hiasa maharitra isaky ny boriborintany enina.
