Andro fahavaratra : Fantaro ireo fiarovantena amin'ny Varatra
Sompatra matetika no andraisan'ny Malagasy ny Varatra milatsaka ka mamono olona na mandrava fananana. Mety hisarika varatra nefa ny tsy fitandremana amin'izao vanimpotoana fahavaratra izao.
Mila ampitomboana ny fahamailoana rehefa avy ny orana. Tsara mihitsy raha mamonjy fodiana avy hatrany rehefa manambana ny loza, mba ho fisorohana ny loza samihafa.
Ireto àry misy torohevitra vitsivitsy raha toa ka matahotra Varatra.
Raha ao anaty Trano
Rehefa mitrahotraho iny ny orana dia hidiana daholo ny varavarana sy ny varavarankely. Tsy iankinana ny rindrina raha "béton" satria misy vy ao anatiny.
Azo antoka kokoa ny fiarovana ny aina raha tsoahina avokoa ny fitaovana rehetra mitsatoka amin'ny "prise" : fahitalavitra, fera, finday, sns.
Raha amin'ny toerana ankalamanjana
Raha toa ka tratran'ny orana eny an-dalana noho ny antony samihafa, fadiana ny mialoka ambany hazo na eny amin'ny "distributeur automatique" na eny amin'ny kiosque vita amin'ny vy. Raha amin'ny toerana malalaka, tsara raha tsy mijoro irery na mihazakazaka : mandeha moramora mamonjy toerana misy trano ohatra. Mazava ho azy, tsy maintsy miala ao anaty rano (ranomasina na dobo) raha vao manomboka mitrahotraho ny orana.
Amporisihina ny famonosana tsara ny zavatra misy vy, raha sendra mitondra izany : famaky, angady, etazera vy, sns.
