Fanalan-jaza : ireo mety ho « risques » ara-pahasalamana aterak’izany

Ireo « risques » ara-batana mety ateraky ny fanalan-jaza

Miankina amin’ny fomba nanatanterahana ny fanalan-jaza sy ny « stade » an’ilay vohoka ny « risques » ara-batana mety aterak’izany :

Fanalan-jaza amin’ny alalan’ny fanafody

Amin’ny ankapobeny dia eo amin’ny faha 7 herinandro hatramin’ny faha 9 herinandro ny fitondrana vohoka no tanterahana ny fanalan-jaza amin’ny alalan’ny fanafody, miankina amin’ny firenena misy ilay olona. Anisan’ireo « risques » mety aterak’izany ny hoe :
-Tsy nandaitra ilay « procédure » ka tsy nitsahatra araka ny tokony ho izy ilay vohoka. Raha izany no mitranga dia mila miditra amin’ny fanalan-jaza « chirurgicale » ilay bevohoka ;
-Mandeha rà be (hémorragies). Mampandeha rà betsaka sy ela matetika ny fanalan-jaza amin’ny alalan’ny fanafody. Indraindray nefa mety mivadika ho « hémorragie » izany ka lasa mila ampidirana rà na atao « curetage » (sokirina) ilay vehivavy hampitsaharana ilay vohoka ;
-Otrikaretina. Mety mitarika aretina ao amin’ny tranon-jaza raha toa ka misy tsy afaka ny « tissu » ny ahitra ;
-Manaintaina. Ny fikainkon’ny tranon-jaza atareky ny fanafody dia mety tena manaintaina be ka ilaina fampiasana « antalgiques » na fanafody manala fanaintainana mahery vaika.

Fanalan-jaza « chirurgicale »

Matetika dia eo anelanelan’ny faha 7 hatramin’ny faha 14 herinandro aorian’ny tsy fahatongavan’ny fadim-bolana eo amin’ny bevohoka no hanatanterahana ity fomba fanalan-jaza ity. Miompana amin’ny « aspiration » na fitrohana ny ao anatin’ny tranon-jaza izy io. Anisan’ireo « risques » mety mitranga ny hoe :
-Goaka ny tranon-jaza. Isan’ny fahasarotana lalina vokatry ny fandavahan’ilay fitaovana fanalan-jaza ny tranon-jaza izy io. Mila fandidiana fanampiny izany hitsaboana sy hanavotana ilay bevohoka ;
-Otrikaretina. Mety mitarika otrikaretina ao amin’ny tranon-jaza ihany koa ny fanalan-jaza « chirurgicale » ;
-Mandeha rà be ;
-« Syndrome d’Asherman ». Fahasarotana tsy fahita firy izy io. Miseho amin’ny fisian’ny firaiketana na olatra ao anatin’ny tranon-jaza izany ka mety tsy mampiteraka na mampikorontana ny fadim-bolana any aoriana ;
-Sarotra mitoe-jaza rehefa any aoriana. Isan’ireo « risques » mety mitranga izany, indrindra raha toa ka tsy azo antoka ny toerana sy ny fitaovana nampiasana tamin’ny fanalan-jaza.

Ireo « risques » ara-tsaina

Mety misy « risques » ara-tsaina eo amin’ny vehivavy ihany koa ny fanalan-jaza. Miankina amin’ny anton-javatra maro moa ny mampisy izany, toy ny antony nanalana zaza, ny fanohanan’ny manodidina… Anisan’ireo « risques » ara-tsaina mitranga ny hoe :
-Manenina sy manamelo-tena ;
-« Troubles de l’humeur », mahatsiaro tena malahelo, mitebiteby na koa tratry ny fahaketrahana taorian’ny nanalana zaza.