Yas Madagasikara – Lalao’tsika : Lasan’i Roussel sy Rafidison Antoine ny moto « scooter new eagle 50 Nitro »

Moto hatramin’ny lelavola 4 000 000 ariary

Naharitra iray volana teo no nanatanterahana ny lalao rehetra. Ireo mpanjifa nampiditra « offre » 1 000 ariary noho mihoatra no nandray anjara tamin’ny fisarihana ka afaka nisitraka ireo loka isan-karazany. Tao anatin’izany dia moto « scooter » miisa roa no loka lehibe indrindra raha lelavola mitentina 4 000 000 (4 tapitrisa) ariary ny farany. I Roussel sy i Rafidison Antoine no tsara vintana nahazo izany moto izany. Natolotra azy ireo ny taratasy momba izany tamin’ity anio ity. Tamin-kafaliana no nandraisan’izy ireo izany ary isan’ny efa niriana ihany koa ity fitaovam-pitaterana ity, raha ny fanazavan’izy ireo. Entina indrindra hialana amin’ny fitohanana eto an-drenivohitra.
Ankoatra ireo moto ireo dia olona hafa miisa 28 ihany koa no nahazo ireo loka samihafa. Tao anatin’izany ny finday, ny fahitalavitra, ny PS5, ny lelavola, ny fitaovan-dakozia samihafa ary ireo tolotra samihafa ao amin’ny orinasa Yas, toy ny « fibre GO » haharitra 12 volana.

Andiany fahefatra

Nomarihin’ny avy ao amin’ny orinasa Yas Madagasikara fa andiany fahefatra ity notanterahina ity. Lalao izay efa handrasan’ireo mpanjifa isa-taona. Tsara ny mampatsiahy fa efa nanomboka ny 20 desambra ny lalao ary nifarana ny 4 febroary lasa teo. « Tanjon’ity lalao ity dia ny mba hampahafantarana ireo tolotra rehetra afaka hampiasaina sy fitiavana te hanome loka ny mpanjifa fotsiny », hoy i Kanto Rasendralahy, Chargé d'étude et analyse marketing, mpisolo toerana, ao amin’i Yas. Ankoatra izay moa dia efa nisy ihany koa ny fizarana fanomezana isan-karazany nandritra ny fotoan’ny lalao. Tao ny fahana, ny data sy ireo tolotra samihafa.